चितुवाको आक्रमणबाट बर्दियामा दुई जना घाइते

ज्ञानेन्द्र पोख्रेल

बर्दिया — चितुवाको आक्रमणबाट बर्दियामा दुई जना स्थानीय घाइते भएका छन्। घाइते हुनेमा राजापुर नगरपालिका–९ इश्वरिगन्जका शिबराज सेजुवाल र देबिराम बस्नेत रहेका छन्।
प्रहरीका अनुसार मकैबारीमा लुकेर बसेको चितुवालाई लखेट्ने क्रममा उनीहरू घाइते भएका हुन्। चितुवा देखिएपछि निकुञ्जको डाँक टोली बोलाइएको भए पनि टोली अन्यत्र व्यस्त रहेकाले तत्काल पुग्न सकेको थिएन। त्यसपछि सुरक्षाकर्मी र स्थानीयले मकैबारी क्षेत्रमा निगरानी बढाएका थिए।
भारतीय जंगल नजिकैको क्षेत्र भएकाले चितुवालाई होहल्ला नगरी सुरक्षित रूपमा फर्काउने योजना बनाइए पनि स्थानीयवासी आफैं चितुवालाई धपाउन जाँदा घटना भएको प्रहरीले जनाएको छ।
घाइते सेजुवाललाइ उपचारको लागि स्थानिय स्वास्थ्य केन्द्र लगिएको स्थानीय महेश चौधरीले जानकारी दिनुभयो । घटनापछि उक्त क्षेत्रमा सतर्कता बढाइएको छ ।